يوميات مريم 7

وصلت عند اسماء غير حلات ليا الباب ماشعرتش براسي تلاحيت عليها وبديت كانبكي بحاليلا يالاه فقت من الصدمة كانبكي بحرقة على ايامي لي ضاعو هاكداك هي تخلعات عليا وبقات كاتسولني ياكما مات شي حد اولا البنات وقعات ليهم شي حاجة داتني للصالون وجابتليا عصير بارد شرباتوليا بزز ماخلاتنيش نهضر اولا نعاود عنقاتني وقالت ليا بكي مزيان بحال ايلا حسات بيا محتاجة للبكا اصلا هو رد الفعل الوحيد لي نقدر ندير مابيدي حيلة

من بعد ماتهدنت شوية بدات كاترجع فيا الروح عاودت لاسماء كلشي القصة من اللول اسماء بقات مصدومة بقيت فيها مسكينة حيت حسات بيا عارفا لي كاين حيت حتا هي مزوجة وعندها وليدات قالت ليا ماتخافيش واحسن حاجة درتيها انك ماواجهتيهش وطلبتي المساعدة ديالي لان فحالة الخيانة الزوجية اخطر حاجة تقدر ديرها المرا هي المواجهة خاصها تبت وتعرف ماتدير قالت ليا اسماء"حبيبة انا كانعرفك من شحال هادي وعارفاك من اطيب خلق الله لدرجة السداجة راه الوقت تبدلات واش يصحاب ليك رجال دابا هوما رجال زمان؟ايلا ماماك نجحات ليها القضية هدا ماكايعنيش بلي خاصك تتصرفي بحالها الرجل تبدل ولا كايشوف فالمرا حوايج خرين من فير انها تطيب وتصبن ليه عادل راجلك انسان متشبع بالتقافة الغربية فاش ختارك النهار الاول حيت عجبتيه بنتيليه انسانة طموحة وحيوية والدليل هو المعارضة ديالو لانك تخرجي من القراية هو عاش بالزاف ديال التجارب فحياتو ماكافياهش مرا لي تطيب ليه والا كان يقدر يبقا مع الوالدة ديالو هو بغا مرا بكل معنى الكلمة فاهمة وواعية يقدر يستاشرها ويخرج معايا ويلعب معاها ويهضر معاها فالثقافة والرياضة وكلشي مابغاش مرا ضعيفة مقابلاه غير هو فين خرجتي معامن كنتي مابغاش مرا حياتها كاتلخص فراجل الخطا الكبير لي درتي واللي كايديروه اغلب المتزوجات هي انكي تخليتي على حياتك على صحاباتك هواياتك وليتي منعازلة تبدلتي حتى فشكلك فين هي مريم لي كانعرف لي ايلا حضرات لشي عرس كلشي يبقا حال فمو والخطاب كايتسابقو عليها؟فيناهي مريم لي دافعة كبير وعاجبها راسها وكاتبغي راسها وعمرها ماكاتسبق مصلاحت شي حد على ديال راسهت؟ايوا سمحيليا اصاحبتي هو تبدل عليك حيت ديك السيدة لي بغاها وختارها تشاركو حياتو ماتت طبيعي انه يتبدل انا ماكانلقاش ليه الحجج حيت داكشي لي دار لا يغتفر ختار طريق ساهلة طريق الحرام.عمرك ماتديري السبة بالولاد هانتي شوفيني انا عندي وليد فعمرو سبع سنين وبنيتة فعمرها 3سنين وعمرني تشكيت منهوم الولاد مادارو والو غير الوحدة ايلا فشلات فحياتها الزوجية كادير السبة بالولاد"..