يوميات مريم 6

المرا فاش كتولي ام كتقدر تضحي ودير شي حوايج مامرتلحاش ليهوم على قبل ولادها ...مسحت دموعي لي نزلو غير بوحدهوم مسحت الميساج باش مايلقاهش محلول دريت البورطابل لبلاصتو وديت البنات لبلاصتهم عيطت لايمان لوستي طلبتها تجي دابا حيت عندي مانقضي خرج من الدوش وجا عندي قاليا بلي غايدوز الويكاند مع صحابو انا بالصدمة ديال الميساج وليت وحدة اخرى كانشوفيه ببرود مابقات كاتهمني حتى حاجة انا فحرب ماخاصنيش نخرج منها خاسرة تصرفت معاه عادي وقلت ليه بلي خاصني نمشي عند صاحبتي حيت دايرة عراضة للعيالات وافق فالحال حيت من مصلاحتو نخوي الدار جات ايمان ماقدرت نعاود ليها والو حسات بيا بلي ماشي طبيعية قلت ليها بلي انا مزروبة دابا ومنين نجي نفسرليها كلشي لبست حوايجي و تاصلت بصاحبتي اسماء قرات معايا من الكوليج صحبة قديمة عاشت معايا مراهقتي وشبابي هي مزوجة قبل مني وساكنة قريبة شوية تاصلت بيها باش نشوفها واش كاينة فالدار رحبات بيا وفرحات بالزااف حيت غادي نجي لعندها.

اسماء مرا دكية بالزاف عندها واحد اللباقة خطيرة كانت بنت زوينة وفنفس الوقت جدابة كلشي كاينتابه للحضور ديالها فينما مشات وكانت علاقتها مع راجلها مثالية تزوجو عن حب وكل نهار كتعيشو عروسة جديدة انا عارفا راسي مقفراها وماكاين لي غادي يعاوني فموصيبتي من غير الله سبحانه و تعالى و الصلاة و الدعوات و الاستغفار و الصلاة على النبي و استاشرة اسماء اللي كنت كنحس بحال الا الله سخرها ليا و الحمد لله

كنت دايخة ماعارفا مندير فطريقي لاسماء فكرت فشحال من حاجة فكرت فالانتحار ماعندي علاش نعيش حياتي كلها تقليات فلحظة وحدة ماعندي لاقراية لا والو كلشي خليتو على قبلو كانت داري هي لي كانكساب عايشة فيها مع راجلي وبنياتي شحال صعيب احساس الخيانة صعيب بالزاف كاتحسي بالغيرة فقلبك والكره كاتكرهي راسك راجلك الناس كاتبانليك الدنيا كحلة كاتحسي بالغدر...