يوميات مريم 2

نهضر ليكم شوية على راجلي باش تتوضح ليكم الصورة اكثر حبيبي وراجلي لي مازال كنموت عليه لحد الان سميتو عادل كبر مني بخمس سنين رجل متحرر بالزاف عاش حياتو فالمانيا قرا الاقتصاد ورجع للمغرب اسس الشركة ديالو راجلي بوقوص اصلا داكشي باش عجبني من النهار اللول حيت كنت سطحية بالزاف ههه قاري وواعي فاش كتهضري معاك كتحسي براسك كاتخاطبي شي وزير عندو مع الهضرة والفهامات رجل حنين ورومانسي لاقصى لحدودا.

راجلي كان كيهتم بيا بالزاف كان حنين معايا وكيبغيني لدرجة ماكتصورش على البال عمرو خلاني مخصوصة من شي حاجة لي كنطلبها ليه كاتحضر كايفيق بيا وينعس بيا هادشي فالشهورا اللولين ديال الزواج كان كيشريليا غير الحوايج الغاليين والماكياج ديال الماركات مالروايح لي ولابد منهم كايفرش الدار احسن فراش ومكيرضاش الناس يعيبوه بشيحاجة انا كنت ديما مخاصمة معاه على هاد القضية كنت كنقوليه مالك اعادل كضيع الفلوس راه نقدرو شي نهار نوقعو فازمة ونوحلو كان داك الزواق لي كايشريليا كايبانليا مضيعة للفلوس والوقت انا زوينة اصلا رشيقة وجسمي بحال ديال هيفاء وهبي يعني ضعيفة فالبلايص ديال الضعف وعامرة فالبلايص لخرين كان شعري غادي للحمر وحنطية واللي كان مميزني عينيا خضرين وكبار عادل كان كيعيط ليا المشيشة ديالي وكان كيعجبني الحال