يوميات مريم 3

دازت الايام الحياة ديالي الزوجية كانت طبيعية وحياتي بصفة عامة...اصلا حياتي كلها ولات كدور على علاقتي براجلي سديت على صحاباتي بالمرة حيت ماما كانت كاتقوليا غايجيبوليك غير الصداع تخليت على الرسم اللي كان الهواء لي كنتنفس بيه كنت كانمشي ايام من بعد الانتحانات للطبيعة كانجبد الوراق والاقلام وكنبدا نرسم كنت واعرة فالرسم تخليت حتى على المعهد فاش كنت كنتعلم الكيتار يامات الليسي ولافاك تخليت على الندوات ديال التنمية الداتية ليكانو كيعلمونا فيه كيفاش نواجهو العالم ونواجهو نفوسنا كيفاش تكون شخصيتنا قوية ...

منقدرش نقول بلي عادل السبب بالعكس هو ديما كان كيشجعني على الهوايات ديالي كان كيقوليا ايام الخطوبة انا كانشوفيك بنت متميزة بالزاف عندها ماتقول وعارفة شكادير حتى فاش قلتليه بلي غادي نخرج من القراية عارض فاللول ومن بعد دار ليا خاطري باش منتقلقش انا وليت كانحس بلي شيحاجة ماشي هي هاديك وليت كانحس بلي مابقاش عاجبو الستيل ديالي كايحاول يبدلني ماعاجباهش الطريقة ياش كنتصرف والنظام لي ختاريت لحياتي كنت كنتعجب كنقول مع راسي علاش تبدل ياك انا ديما مهليا فيه وديما كنطيبليه لي تشهات خاطرو وعمرني هزيت فيه العين ولي طلبهاليا كانديرهاليه وعمرني عارضتو فشي حاجة حتى من الناحية الجنسية كنت كانحاول ندير جهدي غير باش ندير الخاطر لحبيبي حيت عزيز عليا وحتى خلال الممارسة كانحاول نبينليه بلي عاجبني الحال ومستمتعة واخا كانتسناه غير ايمتا يسالي؟؟؟ هاد الاسئلة بقاد كاتدور فراسي شي يامات ولكن دغيا تلاشات حيت مرضت وليت لي كاناكلها كانردها صفاريت ومابقا عندي الخاطر لحد داني راجلي للطبيب مخلوع عليا قاليه الطبيب مبروك المدام حاملة وعندها التوام....