يوميات مريم 4

انا وعادل كنا غادي نطيرو بالفرحة واخيييري غادي نوليو اباء هاداك كان الحلم ديالنا نت ايامات الخطوبة احساس لا يوصف والتوام من الفوق...فترة الوحم دازت عليا صعيبة كنت كل نص ساعة كانوض نرد ضعافيت بقلة الماكلة حسيت بواحد التغير كبير فالاشهر الاولى كرشي بدات كاتبان اوبديت كانتقال وكانغلاض وليت قد البوطة ههه راجلي كان كايعاملني بحال شي اميرة كان مسكين فالصباح كايجيب ليا الفطور فالفراش وماكايخلينيش نهز التقل جات ختو سكنات معانا هي اعز وحدة عندي من لويساتي كانت صغيرة فالسن فعمرها 19 كاتقرا علم النفس وبحكم اننا فشهر6 جات تدوز عندنا العطلة ومنها نيت تعاوني كانت انسانة يبة بمعنا الكلمة حطيها على الجرح يبرى صاحبتي وختي لي تقالت عليا خفافت عليها وكيفما غادي تشوفو من بعد هي لي غادي تعاوني فالمشكلة العويصة لي كانت غاتهدم ليا عشي...

ولدت بخير وعلى خير جوج تويميات بحال القمر سماهم راجلي هدى ونرجس العائلة تجمعات وكلشي فرح بالزيادة درنا العقيقة حلف حتى يدبح جوج حوالا للوحدة وانا كيف ما العادة كانعارضو كايبان ليا كايخسر بالزاف ديال الفلوس فوالو ولكن هو دار لي فراصو ختو ايمان بقات معايا واخا جاو خواتاتي مابغاتش تفرق معايا حيت ولفاتني وولفتها دازت الايام كبرو البنيتات ولات عندهم 5 شهور وحتى انا كبرت معاهم تبدلت بالزاف الوزن ديالي دوبل وليت عامرا شحمة وكرشي مدلية من بعد ماكانت الفورمة ديالي كايتضرب بيها المثل هملت راسي بالزاف التربية كانت صعيبة كنت كانفيق فالليل كثر ماكانعس من بعد ما ايمان مشات تقرا وخلاتني واحلة ماعارفا مندير ولات حالتي حالة شعري خفاف بالزاف سناني صفارو وجهي ولا عامر بالكلف وليت بكل بساطة كنخلع وحتى من الناحية النفسية تبدلت بالزاف وليت عصبية بلا قياس غير كانغوت على اتفه الاسباب خصوصا على عادل بحاليلا كانرجعليه السبب ديال اي مشكل ولو كان صغير

العلاقة الحميمية مع راجلي هي اكثر حاجة تدهورات وليت ماكنعس معاه غير مرة فالشهر وحتا هو ولف مابقاش كايحكر او بالاحرى فقد الرغبة فيا حيت تبدلت عليه بالزاف شرفت قبل الوقت واخا عمري فالعشرينات .

عادل حتى هو تبدل عليا ولا كايخرج من الدار وماكايجي حتال نصاصات الليل كايجي عيان كيتعشا وينعس حتى بناتو مابقاش مسوق ليهم وانا بطبيعت الحال ماكانقصرش من جيهتو بالسبان والنكير باختصار حياتنا ولات جحيم حتال واحد النهار قلت نجمع راسي ضربتعا للدار بواحد التخميلة فاعلة تاركة المهم خليت كلشي ناضي وواجد على حقو وطريقو قلت مع راسي اجي نبدل حوايجي مشيت جبدت واحد البيجاما كان شراهاليا على دوقو عمرني لبستها كانت كتجيني معيقة ومبرهشة فاش لبستها وتقابلت مع المرايا تصدمة واايلي هادي انا؟ الفوق ديال البيجاما صدافو غادي يطرطقو بالكرش وكلها مزيرة عليا صراحة تصدمت ولكن ماتسوقتش بالزاف جبدت واحد البيجامة واسعة نت الماريو ولبستها هي بعدا كاتغطي الفورمة العوج...