يوميات مريم 5

جا عادل دخل سلم قابلتو بواحد الابتسامة عريضة ماردهاش ليا مشا نيشان للطبلة حطيتليه الغدا كنتسناه يهضر اولا يشكر الغدا اولا النقاوة ديال الدار والو ماقال حتى كلمة سولتو كيف غادية الخدمة قاليا الحمد لله كلشي مزيان راجلي تبدل عليا بالزاف فاللول كان غير كايدخل ماكايسكتش من الهضرة كايعاود ليا كل صغيرة وكبيرة حرت مابقيت عارفا مندير عقت براسي بلي دخلت لمرحلة الخطر وبلي ايلا بقينا هاكدا العاقيبة غاتخرج خاايبة

جلست كانفكر مع راسي اش هاد الحالة لي وصلت ليها مابقيتش كانعرف راسي دابا عاد فهمت علاش العيالات كيتبدلو من بعد الزواج والعلاقة مع رجالهم كاتبدل وكايدخلها الفتور ولكن راه الهضرة ساهلة عليهم يقولولينا تقادو وديوها فراسكوم وفينا ماشافوش المسؤولية لي علينا كانضلو سهرانين باش نربيو ليهم ولادهم وكانضلو واقفين فالكوزينة ووو شحال ديال الحجج لقيت لراسي وشحال بقيت كانقنع راسي بلي انا لي عندي الحق اوبلي ايلا هملتو راه حيت المسؤولية كبيرة وقلت مع راسي اصلا راجلي كايموت عليا ومن المستحيل يديها فشي وحدة خرى حيت كانطيبليه وكانصبن ليه حوايجو بحال لي كادير ماما وانا هي ام ولادو ...شحال كنت مكلخة وشحال كان تفكيري محدود

الوقت غادي وكيدوز العلاقة بيني وبين عادر غاديا وكاتكفس السيد مابقا كايشري ليا لا حوايج لا ماكياج لا والو من بعد ما كان كايعمر ليا الماريو وكايطلبني ويزاوكني نلبس ليه ونتقاد ولا كايجي للدار غير باش ياكل ويشوف هدى ونرجس انا ماكنهموش تبدل حتى من ناحية اللبس وليت كانشوفيه بحال داك الراجل لي عرفتو ايامات لافاك ماكايخرج من الدار حتى كايقيل ساعة قدام المراية يتقاد والروايح والحالة وكايجي فرحان وراشقاليه كايلعب مع بناتو غير كايشوفني كايتغوبش ويضور وجهو بحاليلا قاتلاليه الروح حسيت بيه ولا كايعيف مني ولكن بالرغم من كلشي عمرني شكيت فيه اولا فكرت بلي يقدر يخوني شي نهار كان كايصحابليا داكشي كايوقع غير لفريدة ووليد فسامحيني .

واحد النهار كان عادل داخل للدوش وانا كانرضع البنات فوق الناموسية هو يمكن نسا بورطابلو فوق الكوافوز حيت موالف ديما خاشيه معاه وداير ليه مودباس هو يالاه دخل بقا البورطابل ماكتيفي وصلو ميساج قلت مع راسي نشوف شكون لاتكون شيحاجة فالخدمة ضرورية اولا دارهم بغاو شيحاجة اصلا مافيها والو راجلي هداك غير حليت الميساج حسيت باللي الدنيا وقفات ولا كايبان ليا غير الضباب يديا كايترعدو النفس ديالي تقطع كنت فحالة صدمة كبيرة لهلا يجعل شي مسلمة تعيشها ولي منكم دايزة عليها الخيانة الزوجية غادي تفهمني الميساج كان بسمية "قلبي" مكتوب فيه "حبيبي شكرا بالزاف على الكادو حمقني توحشتك بالزاف وبغيت غير امتا نشوفك وراني موجدة ليك مفاجئة عمرك تنساها كنبغيييك "

الحمد لله لتبتني فهاديك اللحظة الصدمة كانت قوية لدرجة انني مادرت والو بقيت كانشوف ماتحركتش دازت من قدامي شحال من حاجة فكرت نوض للكوزينة نهز موس ونقتلو فكرت نهرب ونخليه فكرت فشحال من حاجة ولكن فالاخير فكرت فهدى ونرجس بناتي اللي مازال ماحلوش عينيهم على الدنيا هوما اغلى حاجة عندي المرا فاش كاتولي ام كاتقدر تضحي...