قصة ملك 5

جا اليوم الموعود اللي هو النهار اللي غايخطبني فيه ..دارو مع ماما غايجيو لغدا المهم فقت الصباح بكرييي وليت حادقة زعما دوشت ومشيت عند الكوافورة ودخلت كنفوح على ختي الصغيرة بشعري هههه مهم اليوم فرحانة وخاصني نفش غدايدي لبست قميص ديالي وكنطل على ماما مسكينة كانلقاها هي وختي قربو يساليو و كيوجدو غير فالعصائر والديسير دخلت عندها مسكينة بالفرحة بدات كاتبكي وعنقاتني  قالتلي كبرتي ابنتي وولاو كيخطبو فيك..ايوا جاو لغدا نيت وكلسو مع ماما وباابا وعاودليهم على راسو بانه رجل اعمال وانه باه مات وهو صغير وخوه  الكبير تخلى على قرايتو فالخارج باش مايخليش الشركة ديال باه بين ايد الشفارة خصوصا وانه عمامه كانو طامعين فيهم وانه بفضل خوه الكبير مشى لامريكا وقرا البزنس تما وجا عاون خوه فالخدمة وانه كايتسارى المدن كاملين وعنده فيلا فطنجة والدارالبيضاء حيت كايجي ليها بزاف وانا خدمتهم مرتبطة خصوصا بهاد جوج ديال المدن ..وانا كالسة كانتصنت من مورا الحيط وكايبانلي بابا فرحاااان و عاجبه المهدي حيت  كايبان راجل وقاد براسه ومتحمل المسؤولية وغادي يعيش بنتو احسن عيشة..المهم بقات هدرا كتجيب هدرا وبقاو تاشربو معانا اتاي هي فين خاصني نبان وتشوفني الواليدة دياله ..عطاتني ماما جوج طباسل ديال الحلوى وقالتلي يلاه تبعيني منقولش ليكم كنت لابسه زعما الطالون ساعا رجليا بداو كايقفقفو خصوصا ملي بانلي هو جالس حدا بابا وكايبتسم ليا وقلت موحاااال هاد الطالون يوصلني تالطبلة سالمة ..بقيت كنطلب فختي تجيبليا بلغة ديال ماما بزز باش جابتهاليا البرهوشة ..المهم غادية مورا ماما  وحادرة راسي  نااااري بغيت غير امتى نوصل للطبلة دغيا ونغبر فحالي ..غير شافتني الواليدة ديالو قالتلي تبارك الله تبارك الله سلمت عليها وعلى خوه منير وسلمت على المهدي مديت ليه ايدي وورك عليها بجهد المسخوط ماعارفش انه ماشي وقت الضحك هدا راني ماقاداش نوقف على رجليا ..وغبرت فحاالي دغيا من بعدها قبل ماتبدا الواليدة دياله تقشب معايا ونصدق مخرجة شي هدرة فشكل..المهم تافقو على كلشي هداك النهار وكان القرار انه تكون الخطبة الرسمية من بعد ماندوز امتحاناتي ...