قصة ملك 6

دوزت الامتحانات بالفعل ونجحت الحمدلله وجا نهار الخطبة كيف تافقنا معاهم وعرضنا على العائلة كلها باش يحضرو فاسعد نهار ممكن البنت تعيشو ولاحظت فعينين شي وحدين من العائلة الحسد خصوصا اني كنت اصغر بزااف من بناتهم الي عاطينها غير التصاحيب والمكياج  وانه المهدي حمر ليا وجهي بالهدية اللي جابلي كلشي بقا غير حال فمو ومع ذلك كنت فقمة الفرح هاداك النهار حسيت كانه تولدت من جديد ولبسلي خاتم الخطوبة وباس ليا يدي كنت بحال شي اميرة وقدام هداك الفارس المغوار الي كنا كانتفرجو فيه فالرسوم المتحركة ههه وبنادم جالس ولكن كاتحس بيه ماحاملكش وكايتغامزو عليا زعما راه غير الزهر الي معندهمش  ..المهم من بعد الخطوبة الي اقل مايمكن القول عنها انها كانت روعة..و بدينا كنوجدو للعرس وتافقنا على انه يكون في بداية شهر 9 باش نيت ندخل لافاك وانا صافي مزوجة بالمهدي وواعدني انه نستقرو هنا فالفيلا لي عنده فكازا بينما كملت الاجازة عاد نمشي لعنده لطنجة ونخدم معاه فالشركة  ..ايوا كان فينما كايجي لكازا كانمشيو نوجدو دارنا وكانتخير فالفراش للي عجبني من بعد كانديروها سبة وكانتعشاو فاحسن المطاعم اللي موجودة على البحر كنت فقمة السعادة وكانحس اني خدت سيد الرجال واميرهم كان كايسالي معايا بالادب والرقي دياله وكيف كان كيحتارمني وكيسحرني بهدرتو اللي كلها رومانسية  ..فواحد النهار دار معايا كيف العادة باش يجي ياخدني من دارنا باش نمشيو نختارو الخواتم.. قالي انا نتعشا دابا دغيا ومن بعد نشد الطريق لعندك  لكازا باش فالصباح نمشيو بكري وندورو على خطرنا وكانت الساعة 10 ديال الليل وتافقنا غير يوصل يعيطلي باش هاكا نطمئن عليه ...